عمران خان اور ہمارے قائدین سمیت دیگر اسیران کو رہا کیا جائے، عمر ایوب

میڈیا سے گفتگو کرتے ہوئے لیڈر آف دی اپوزیشن عمر ایوب نے کہا کہ مجھ پر فیصل آباد اور حسن ابدال میں 5 موٹرسائیکل چوری کے مقدمے ہیں، لیڈر آف دی اپوزیشن کو موٹر سائیکل چور بنا دیا، سوچ رہا ہوں دکان کھول لوں، سانحہ ڈی چوک پر جوڈیشل کمیشن بنایا جائے، 9 مئی واقعات کی سی سی ٹی وی فوٹیج سامنے آنی چاہیے، فوجی عدالت کے فیصلے کی مذمت کرتا ہوں، ملٹری کورٹ ملٹری کے کورٹ ہیں، ان کے فیصلے کے خلاف عدالت سے رجوع کریں گے۔

عمر ایوب کا کہنا تھا کہ عمران خان اور ہمارے قائدین سمیت دیگر اسیران کو رہا کیا جائے، جب تک آئین اور قانون کی بالادستی نہیں ہوگی ملک میں استحکام نہیں آئےگا، باہر کے لوگ یہاں سرمایہ کاری نہیں کررہےہیں کیونکہ یہاں استحکام نہیں، شفاف الیکشن ہمارا مطالبہ ہے، الیکٹرانک ووٹنگ مشین کے ذریعے صاف شفاف انتخابات کرائے جائیں گے۔