پیپلزپارٹی پاکستان کے خلاف ہر سازش کو ناکام بنائے گی، بلاول بھٹو

گڑھی خدا بخش میں بینظیر بھٹو کی 17ویں برسی کے موقع پر چیئرمین پیپلزپارٹی بلاول بھٹو  نے جلسے سے خطاب کیا، جس میں اُنہوں نے کہا کہ کچھ طاقتیں میلی آنکھ سے دیکھ رہی ہیں کہ پاکستان ایٹمی طاقت نہ ہو، امریکا نے پاکستان کے میزائل پروگرام پر پابندیاں لگائی ہیں، پیپلزپارٹی کے ہوتے ہوئے پاکستان کے ایٹمی پروگرام پر کوئی سمجھوتا نہیں ہوگا، جو آج بیانات داغ رہے ہیں کیا یہی وہی لوگ نہیں جو پاکستان کے ایٹمی پروگرام کے خلاف ہیں، کیا یہ وہی لوگ نہیں جو اسرائیل کی حمایت میں اور اس شخص کی حمایت میں بیانات دیتے ہیں یہ وہی لوگ ہیں جو ہمیشہ پاکستان کے ایٹمی، میزائئل پروگرام کے خلاف بیانات دیتے ہیں۔

بلاول بھٹو نے کہا کہ تاثر ہے مخصوص لابی چاہتی ہے ایسی حکومت آئے جو طاقت کے لیے ہر چیز پر سمجھوتا کرے، پیپلزپارٹی کے ہوتے ہوئے اس قسم کی کوئی سازش کامیاب نہیں ہوسکتی، پیپلزپارٹی ہمیشہ پاکستان کے مفاد کو ترجیح دیتی ہے، پیپلزپارٹی ملک کے خلاف ہر سازش ناکام بنائے گی۔

چیئرمین پیپلزپارٹی نے مزید کہا کہ سیاست کو ایک طرف رکھ کر پاکستان کے دفاع کا سوچنا ہوگا، امریکا نے پاکستان کے میزائل پروگرام پرپابندیاں لگائی ہیں،پیپلزپارٹی پاکستان کے خلاف ہر سازش کو ناکام بنائے گی۔