انسداد دہشتگردی عدالت لاہور میں پیشی کے موقع پر گفتگو کرتے ہوئے شاہ محمود قریشی نے کہا کہ مذاکرات مثبت نتیجے پر جانے چاہئیں ورنہ حکومت ڈگمگا جائےگی، مذاکرات کی ناکامی جمہوریت کے لیے خطرہ ہوگی، مذاکرات ہونے دیں، حکومت وقت پورا کرتی ہے یا نہیں وہ بعد کی بات ہے، پاکستان نازک موڑ پر کھڑا ہے، میری دعا ہے کہ مذاکرات کسی منطقی نتیجے تک پہنچیں کیونکہ مذاکرات کی ضرورت پاکستان کو ہے تحریک انصاف کو نہیں۔
شاہ محمود قریشی نے کہا کہ عمران خان کی سوچ اور فیصلہ ملک کے مفاد کے لیے ہے، تحریک انصاف نے نیک نیتی سے مذاکرات کا عمل شروع کیا ہے، جمہوریت کے دعویدار سنجیدگی سے مذاکرات آگے بڑھائیں،بلاول کو پتا ہونا چاہیے کہ ملک کی ضرورت کیا ہے، آج تک سول ملٹری اتفاق سے ہی ترقی ممکن ہوئی، سیاسی دانش مندی وقت کی ضرورت ہے
شاہ محمود قریشی کا کہنا تھا کہ ہمارا کوئی ناجائز مطالبہ نہیں ہے، جو سیاسی قیدی ہیں ان کو رہا کیا جائے، ضمانت تو قتل کے ملزم کو بھی مل جاتی ہے، ہم ڈیڑھ سال سے جیل میں ہیں، ضمانت ملی نہ کیس شروع ہوا۔
,
